Í nótt var tilkynnt um ölvaðan mann sem hringdi dyrabjöllu íbúðarhúss í Miðborginni í sífellu. Maðurinn reyndist ofurölvi og illa áttaður. Hann var að leita að vini sínum en hafði farið húsvillt. Lögreglan hjálpaði honum að finna hús vinarins og fylgdi honum þangað þar sem vinurinn tók á móti honum.

Tveir ökumenn voru handteknir, grunaðir um að vera undir áhrifum áfengis og/eða fíkniefna. Meint fíkniefni fundust á öðrum þeirra.

Einn ökumaður var kærður fyrir að vera ekki með ökuskírteini meðferðis. Við leit í bifreið hans fundust meint fíkniefni.

Einn ökumaður var kærður fyrir að aka á 131 km/klst á Kringlumýrarbraut þar sem leyfður hámarkshraði er 80 km/klst.  Annar var kærður fyrir að aka á 135 km/klst á Reykjanesbraut þar sem leyfður hámarkshraði er 80 km/klst.