Þann 17. október verður þingfest fyrir Héraðsdómi Reykjavíkur mál gegn 24 ára gömlum Reykvíkingi sem ákærður er vegna fjögurra atvika sem varða meint ofbeldi gegn lögreglumönnum.

DV hefur ákæru málsins undir höndum en fyrsti ákæruliðurinn varðar atvik sem átti sér stað á Ráðhústorginu á Akureyri í ágúst árið 2019. Maðurinn er sakaður um að hafa hótað fimm lögreglumönnum við skyldustörf lífláti, tveimum á Ráðhústorginu og þremur á leiðinni í lögreglubíl á lögreglustöðina á Akureyri.

Næsta atvik varð á Grensásvegi í Reykjavík, miðvikudaginn 1. september árið 2021. Er maðurinn sakaður um að hafa hótað tveimur lögreglumönnum lífláti og síðan þremur öðrum, er hann var á leiðinni í lögreglubíl á lögreglustöð. Hann reyndi síðan að bíta einn lögreglumanninn í hægra hnéð en bitið hæfði hnéhlíf á buxum lögreglumannsins.

Þann sama dag, 1. sept. 2021, er maðurinn sakaður um að hafa hrækt á lögreglumann í fangaklefa á lögreglustöðinni við Hverfisgötu. Lenti hrákinn á vinstra læri lögreglumannsins.

Síðasta atvikið sem tilgreint er í ákærunni átti sér stað 14. ágúst 2021, fyrir utan Gistiskýlið við Grandagarð í Reykjavík. Er hann sagður hafa hótað tveimur lögreglumönnum lífláti og hótað að beita fjölskyldur þeirra kynferðislegu ofbeldi.

Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.