Það var nóg að gera hjá laganna vörðum í gærkvöldi og nótt. Í dagbók lögreglu má sjá að slys vegna rafhlaupahjóla settu svip sinn á vaktina.

Um kl.18 í gær var bifreið ekið á dreng á rafhlaupahjóli. Drengurinn kvartaði um verk í fæti og baki og var hann fluttur með sjúkrabifreið til aðhlynningar á bráðamótttöku. Um kvöldmatarleytið í gær var tilkynnt um slys í miðbænum en vitni sá þá 66 ára mann detta um rafhlaupahjól og á húsvegg. Maðurinn missti meðvitund við fallið og blæddi úr nefi hans. Hann var í kjölfarið fluttur með sjúkrabifreið til aðhlynningar. Annað slíkt slyst átti sér stað kl.4 um nóttina en þá datt ungur maður af rafhlaupahjóli í hverfi 105 og var illa áttaður eftir slysið. Hann er grunaður um ölvun við akstur.

Þá voru allmörg tilvik þar sem að ökumenn voru stöðvaðir og grunaðir um akstur undir áhrifum áfengis eða annarra vímuefna. Einn ökumaður sem var stöðvaður í Kópavogi um kl.22 í gærkvöldi skar sig þó úr en hann reyndist ekki hafa ökuréttindi enda aðeins 14 ára gamall. Segir í dagbók lögreglu að málið sé í vinnslu með aðkomu foreldra.