Helgi Áss Grétarsson, lögfræðingur og varaborgarfulltrúi Sjálfstæðisflokksins, telur að Snorri Másson, fjölmiðlamaður á Stöð2 og Vísi hafi farið með rangt mál í umfjöllun sinni um sálfræðinginn umdeilda Jordan Peterson. Þetta kemur fram í aðsendri grein sem birtist í Morgunblaðinu í dag.
Í greininni gagnrýnir Helgi Áss að Snorri, sem er ekki nafngreindur heldur aðeins kallaður „fjölmiðlamaðurinn“ hafi sett eigin fyrirvara á málflutning sálfræðingsins í umfjölluninni. Að mati varaborgarfulltrúans séu slíkir fyrirvarar í lagi ef þeir séu reistir á traustum grunni en það telur Helgi Áss að að ekki hafi átt við í þessu tilviki.
Meðal annars tekur hann fyrir setningu í umfjöllun Snorra á Vísi um viðtalið sem hljóðar svo:
„Stundum eru kynhormónabælandi meðferðir notaðar til að styðja við trans ungmenni enda er komin löng reynsla á notkun slíkra lyfja við meðferð annarra hópa. Áhrifin þar eru afturkræf.“
Helgi Áss, sem tekur fram að hann sé ekki læknisfræðimenntaður, segist draga þennan fyrirvara Snorra um málflutning Peterson í efa. Byggir hann skoðun sína á skýrslu opinbers rannsóknarráðs í málefnum heilsu og velferðar sem kom út í febrúar á þessu ári.
Segir varaborgarfulltrúinn að samandregið hafi helsta niðurstaða skýrslurnar verið sú að áhættan af notkun kynhormónabælandi meðferða í tilviki ungmenna sé meiri en mögulegur ávinningur af slíkri meðferð. Það sé eingöngu í í undantekingartilvikum sem bjóða eigi upp á slíkar meðferðir.
Að sögn Helga Áss hafi sú niðurstaða verið reist á þremur meginþáttum.
„Í fyrsta lagi hafi verið talið ekki væru fyrir hendi fullnægjandi vísindalegar sannanir fyrir virkni og öryggi þessara lyfja. Í öðru lagi hefur ný þekking rutt sér til rúms sem bendir til þess að ungmennum geti snúist hugur til kynleiðréttingar. Í þriðja lagi þykir óvissa fylgja auknum fjölda ungmenna sem sækjast eftir því að hefja kynleiðréttingarferli, aukning sem er sérstaklega mikil á meðal ungmenna sem eru við fæðingu skráð kvenkyns,“ skrifar Helgi Áss og telur að þessar niðurstöður skýrslunnar sýni að fyrirvara Snorra hafi ekki verið reistir á traustum grundvelli.
Hann tekur fram að hans mat sé að samfélagið eigi að tryggja að umgjörð um málefni transfólks sé í senn vönduð og laus við fordóma.
„Hins vegar sé eðlilegt að raddir efasemda fái að heyrast um viðurhlutamikil læknisfræðileg inngrip í líf einstaklinga undir lögaldri sem miða að því að undirbúa þá fyrir kynleiðréttingaraðgerðir. Öllum, þar með talið Jordan Peterson, er heimilt að hafa skoðanir á því viðfangsefni,“ skrifar Helgi Áss.