Daily Mail segir að Andonov hafi einnig verið þekktur fyrir að drepa óbreytta borgara. Hjá Rússum var hann þekktur sem „Vakha“ eða „Sjálfboðaliðinn frá Buryatia“.
Rússneska dagblaðið Moskovskij Komsomolets segir að hann hafi verið skotinn af úkraínskri leyniskyttu aðfaranótt sunnudags þegar hann tók þátt í næturverkefni.
Andonov gegndi herþjónustu í rússneska hernum frá 1997 til 2005. Þá hóf hann kennaranám en hætti áður en hann lauk því. Hann fór sem sjálfboðaliði til Úkraínu 2014 þegar átökin brutust út í austurhluta landsins þar sem aðskilnaðarsinnar, með stuðningi Rússa, sölsuðu hluta Donbas undir sig.
Hann var skráður í Olkhon-sérsveitina sem barðist í Donbas. Úkraínumenn sökuðu hann um að hafa tekið þátt í fjöldamorðum á stríðsföngum og almennum borgurum í Logvinovo og víðar í Donbas.
Hann er talinn hafa verið í Úkraínu til 2017 en þá hélt hann heim á leið. Hann eyddi öllum sporum eftir sig á samfélagsmiðlum en talið er að hann hafi barist með Wagnerhópnum í Sýrlandi og Líbíu árin á eftir. Wagnerhópurinn er orðlagður fyrir grimmd og níðingsverk, þar á meðal fjöldamorð, pyntingar og morð af handahófi.
