Karlmaður á fertugsaldri hefur verið ákærður fyrir að freista þess að greiða fyrir vörur með fölsuðum peningaseðlum. Atvikið átti sér stað föstudaginn 27. september 2019 en þá var maðurinn staðinn að verki þegar hann framvísaði tveimur evruseðlum, annars vegar 200 evruseðli og hins vegar 100 evru seðli. Segir í ákæru lögreglu að maðurinn hafi vitað eða mátt gera sér grein fyrir því að seðlarnir væru falsaðir.

Í ákærunni kemur fram að brot mannsins séu talin varða við 151. grein almennra hegningarlaga sem hljóðar svo:

Hver, sem lætur úti peninga, sem hann veit að eru falsaðir, skal sæta sömu refsingu sem hefði hann sjálfur falsað þá. Hafi hann haldið, að peningarnir væru ósviknir, þegar hann fékk þá, má beita [fangelsi allt að einu ári eða sektum.

Málið er að öllum líkindum liður í holskeflu falsaðra evru seðla sem skutu upp kollinum fyrir rúmum tveimur árum. Sá lögreglan á höfuðborgarsvæðinu ekki annað í stöðunni en að senda frá sé tilkynningu á Facebook-síðu sinni þar sem varað var við fölsuðum evruseðlum í umferð enda höfðu nokkur tilvik komið upp á skömmum tíma.

Var fólk hvatt til þess að hafa varann á þegar tekið var við greiðslu í erlendum myntum og kanna vel öryggisatriði seðlanna.