Tveir menn voru handteknir á fimmta tímanum í nótt eftir að hafa stungið mann með hníf í Ingólfsstræti fyrir framan skemmistað í miðbæ Reykjavíkur. Mennirnir voru handteknir og árásarþoli fluttur með hraði á sjúkrahús. Í tilkynningu frá lögreglu kemur fram að maðurinn sé enn í aðgerð og því óvíst hvort að hann sé í lífshættu eða ekki. Árásarmennirnir verða yfirheyrðir síðar í dag.

Talsverður erill var hjá lögreglu í nótt og mikið um útköll vegna drykkjuláta auk þess sem fjölmargir voru teknir fyrir að keyra undir áhrifum áfengis og vímuefna. Þannig stöðvaði lögregla bílstjóra sem keyrði yfir á rauðu ljósi á gatnamótum þar sem kyrrstæður lögreglubíll beið. Þegar lögregla stöðvaði för ökumannsins réðst hann til atlögu gegn lögreglumönnum og var þegar handtekinn. Hann er grunaður um að hafa verið undir áhrifum fíkniefna.

Um 16.30 í gær var karlmaður handtekinn á Seltjarnarnesi á stuttbuxum einum saman eftir að hafa haft í hótunum við ungar stúlkur. Viðkomandi var undir miklum áhrifum áfengis og gistir fangageymslu þar til unnt verður að ræða við hann.

Þá slasaðist maður í Kórahverfinu eftir að hafa fengið lok af heitum potti í höfuðið. Var hann fluttur á slysdeild en virðist sem betur fer hafa sloppið nokkuð vel.