Engar eða sáralitlar skemmdir urðu á íþróttahöllinni Miðgarði í Garðabæ vegna vatnselgs sem myndaðist við húsið í gær og flestir fjölmiðlar fjölluðu um. Í fréttatilkynningu á vef Garðabæjar kemur fram að starfsemi hússins hafi ekki raskast á neinn hátt og allar íþróttaæfingar hafi verið á áætlun í húsinu.
„Mikið vatn safnaðist saman fyrirframan húsið vegna margra samverkandi þátta. Vegna veðurs og mikilla leysinga rann vatn niður úr hlíðum Kópavogs, niður golfvöllinn og safnaðist saman á nokkrum klukkutímum. Gatnakerfið á svæðinu ásamt móttökukerfum eru enn í vinnslu enda um nýtt hverfi að ræða,“ segir í tilkynningunni.
Starfsmenn bæjarins brugðust hratt við, unnu hart að því að dæla vatni frá í alla nótt og bjarga skemmdum, og eru þeim færðar miklar þakkir fyrir. Þá segir í tilkynningunni að farið verði í mótvægisaðgerðir til að tryggja að vatnið komist sína leið næst þegar slíkt veður kemur.
