Manni sem fæddur er árið 1998 og er skráður til heimilis á heimavist Menntaskólans á Ísafirði hefur verið birt ákæra og fyrirkall í Lögbirtingablaðinu. Maðurinn mun ekki hafa búið þar lengi og var ekki nemandi við skólann.
Er hann sakaður um að hafa ráðist á mann, sem fæddur er árið 2002. Atvikið átti sér stað 21. ágúst árið 2021. Mennirnir stóðu þá utandyra fyrir utan Hreggnasa í Bolungarvík þegar hinn ákærði er sagður hafa slegið þolandann tveimur höggum í höfuðið með þeim afleiðingum að hann féll í jörðina og hlaut tognun á liðböndum í hægra hné, skurð á hnakka, kúlu og mar á enni hægra mengin, mar á hægri kinn, heilahristing og blæðingu undir höfuðkúpubeini.
Í fyrirkallinu segir: „Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það hann er ákærður fyrir og dómur verði lagður á málið að honum fjarstöddum.“
Auk kröfu um refsingu og greiðslu alls sakarkostnaðar gerir lögmaður þolandans einkaréttarkröfu á hendur manninum upp á rúmlega 1,6 milljónir króna.
Málið verður tekið fyrir í Héraðsdómi Vestfjarða þann 2. mars næstkomandi.
