Tónlistarmaðurinn og nóbelsskáldið Bob Dylan hefur verið lögsóttur fyrir að misnota tólf ára stúlku árið 1965. Frá þessu greinir Page Six.
Dylan á að hafa fengið stúlkuna til að drekka áfengi og nota fíkniefni á Chelsea-hótelinu í New York-borg. Síðan á hann að hafa misnotað hana kynferðislega. Auk þess á hann að hafa hótað stúlkunni ofbeldi, og ollið henni skaða sem hún hefur enn ekki jafnað sig á.
Kæran var lögð fram á föstudag. Talsmaður Bob Dylan hefur vísað ásökununum á bug. „Þessi 56 ára gamla ásökun er ósönn, og við munum verjast gegn henni af miklum krafti.“ sagði hann.
Bob Dylan er nú 80 ára gamall, en konan sem leitar réttar síns 68 ára.
