Tónlistarmaðurinn Auður mun ekki spila á tónleikum með Sinfóníuhljómsveitinni í ágúst eins og stefnt var að. Þetta staðfesti Margrét Ragnarsdóttir, markaðs- og kynningarstjóri Sinfóníuhljómsveitarinnar, í samtali við DV.
Auður átti að vera hluti af tónleikunum Ný klassík sem fara fram í Eldborg í Hörpu 19. og 20. ágúst á þessu ári ásamt Bríeti, Cell7, Flóna, GDRN, Joey Christ, JóaPé og Króla, Loga Pedro og Reykjavíkurdætrum. Á heimasíðu Sinfóníuhljómsveitarinnar hefur myndin sem fylgir viðburðinum verið uppfærð og Auður er ekki lengur á listanum yfir þá listamenn sem fram koma á tónleikunum.
„Hann er búinn að segja sig frá öllum verkefnum þannig hann verður ekki með,“ segir Margrét í samtali við blaðamann en Sinfóníuhljómsveitin hefur ekki náð í Steinunni Camillu, umboðsmann Auðs, vegna málsins. „Það kom yfirlýsing í gær. Við höfum ekki náð í umboðsmanninn hans en hann sendi út yfirlýsingu frá sér í gær þannig við gerum ráð fyrir því að hann verði ekki með.“
Umboðsmaðurinn svarar ekki
Það verður að segjast að það sé ansi óvenjulegt að umboðsmenn svari ekki símanum. DV hefur ítrekað reynt að ná í Steinunni Camillu og skjólstæðing hennar vegna ásakananna sem hafa tröllriðið samfélagsmiðlum síðustu daga. Svo virðist vera sem Steinunn hafi nú lokað á númer blaðamanna DV eftir tilraunir þeirra til að ná í hana en skellt er á um leið og reynt er að hringja í símanúmerið hennar.
Það eru þó ekki bara blaðamenn DV sem ná ekki í umboðsmanninn. „Nei. Við erum að reyna að ná í umboðsmanninn hans,“ sagði Margrét þegar blaðamaður spurði hana hvort þau hefðu náð tali af tónlistarmanninum eða umboðsmanni hans.