Ákæruvaldið gerir þá kröfu að Marek Moszczynski verði dæmdur í ævilangt fangelsi en til vara 20 ára fangelsi fyrir að hafa lagt eld að Bræðraborgarstíg 1 síðasta sumar og orsakað þannig dauða þriggja og um leið sýnt tíu til viðbótar banatilræði. Þetta kom fram í máli Kolbrúnar Benediktsdóttur saksóknara hjá aðstoðarhéraðssaksóknara, sem sækir málið fyrir hönd ákæruvaldsins, rétt í þessu. Marek er jafnframt ákærður fyrir brennu og brot gegn valdstjórninni með því að ráðast á lögreglumenn við handtöku hans hjá rússneska sendiráðinu.

Þá krefst ákæruvaldið að Marek greiði sakarkostnað sem er metinn á rúmar sjö milljónir.

Marek hefur verið metinn ósakhæfur af geðlæknum en dómarar eru ekki bundnir af því mati og geta því dæmt hann sakhæfan og þá til þess að sæta hefðbundinni fangelsisvist.

Fordæmi eru fyrir því að Héraðsdómur dæmi ævilangt fangelsi, en Hæstiréttur mildaði þá refsinguna. Í hegningarlögum segir að dæma megi menn í allt að 16 ára fangelsi, 20 ár ef sérstök tilefni eru fyrir hegningarauka, eða ævilangt.

Að lokum gera 17 fórnarlömb brunans eða ættingjar þeirra kröfur um bætur. Guðbrandur Jóhannesson réttargæslumaður í málinu, skipti lagagrundvelli fyrir bótakröfu fórnarlamba brunans í tvennt eftir því hvort Marek yrði dæmdur sakhæfur eða ekki. Færi svo að dómur dæmdi Marek ósakhæfan byggir Guðbrandur bótakröfu sína á lögum frá árinu 1281, nánar tiltekið á Jónsbók. Í „8. kap“ Jónsbókar, sem er enn hluti íslensks löggjafar, segir, á góðri íslensku:

Ef óðr maðr brýst ór böndum ok verðr hann manns bani, þá skal bæta af fé hans … ef til er … En ef óðr maðr særir mann, þá skal arfi uppi láta vera sárbætr ok læknisfé af fé hins óða.

Dæmi er um að dæmt hafi verið eftir kaflanum í nútímaréttarsögu og hafa þá menn verið dæmdir til þess að greiða bætur þrátt fyrir ósakhæfi sökum geðveikinda.