Fréttablaðið skýrir frá þessu í dag og hefur eftir Daða Gunnarssyni, lögreglufulltrúa hjá lögreglunni á höfuðborgarsvæðinu, en hann annast rannsóknir á netbrotum. „Þetta eru stórar upphæðir. Einstaklingar hafa verið að tapa allt frá 250 evrum, sem eru lægstu upphæðir sem maður hefur heyrt, og svo allt að hundrað milljónum króna,“ sagði hann.
Hann sagði að lögreglan væri að rannsaka mál þar sem einstaklingur hafi tapað 97 milljónum í samskiptum við svikahrappa á netinu. Haft er eftir Daða að svindlið sé ekki einskorðað við eldra fólk þó það sé líklegra en aðrir til að tapa háum fjárhæðum. „Það er allur gangur á þessu. Við erum til dæmis að sjá yngra fólk falla fyrir Bitcoin-svindli. Þú kaupir Bitcoin í gegnum löglegan aðila og lætur síðan þriðja aðila fá rafmyntina í von um skjótan gróða. Það sem við höfum bent á er þessi skjóti gróði. Ef það hljómar of gott til að vera satt er það oftast þannig,“ sagði hann.
Hann sagði að einnig hafi færst í vöxt að fjárfestingasvindli sé beint að fólki. Í því felst að í auglýsingum sé vísað til frægra íslenskra fjárfesta eins og Jóns Ásgeirs eða Björgólfs Thors og fólki boðið að græða „milljarða eins og þeir“. Fólk fjárfestir í þessu og getur fylgst með meintum gróða sínum en þegar kemur að því að fá peningana aftur loka svikahrapparnir á það að sögn Daða.
