Í hverfishóp Árbæinga hafa undanfarið verið umræður um dularfulla lykt í nágrenni við Hraunbæ. Lyktin, sem enn er óútskýrð, hefur valdið nokkrum íbúum hverfisins ama.

„Nú er þessi ógeðslega lykt aftur, finnst neðst í Hraunbæ, komst einhver að því hvað þetta er? Það er ólíft hérna inni eftir að við vorum með allt opið að lofta út þegar þetta byrjaði og astma unglingurinn minn pirruð í öndunarfærunum. Geggjað gaman að vera úti að leika sér í góða veðrinu núna,“ skrifar ein í hópinn.

Einhverja grunar að lyktin komi frá kjötvinnslu í hverfinu eða að hún komi frá Ölgerðinni, sem einnig er staðsett í Árbænum. Allir eru þó sammála um það að lyktin er ekki góð.

Einn íbúi birti skjáskot sem sýndi fram á mengunina sem kemur á sama tíma og lyktin leggst yfir hverfið.

Lyktin dularfulla virðist þó koma úr mörgum áttum og því ekki víst um að allir séu að ræða um sömu lyktina. Einhverjir segjast hafa fundið hana koma úr suðvesturátt en bæði kjötvinnslan og Ölgerðin eru norðan við Hraunbæ.