Jón Ingvar Pálsson, forstjóri Innheimtustofnunar sveitarfélaga (IHS), staðfesti við sjónvarpsþáttinn Kveik að gerður hefði verið samningur við lögmannsstofu forstöðumanns útibús stofnunarinnar á Ísafirði, um innheimtu fyrir stofnunina.

Kveikur hefur haft málið til rannsóknar undanfarnar vikur en segja má að staðarmiðillinn Bæjarins besta á Ísafirði birti í morgun frétt þess efnis að Bragi Axelsson, forstöðumaður IHS á Ísafirði, hefði verið settur í frí og grunur væri um að verkefnum IHS hefði verið úthlutað til fyrirtækis í eigu hans. „Er það litið alvarlegum augum og verður rannsakað til fulls,“ segir í frétt Bæjarins besta.

Í tilkynningu frá IHS í gær kom fram að skipt hefði verið um stjórn yfir stofnuninni og tveir stjórnendur sendir í leyfi vegna ófullnægjandi svara við fyrirspurnum Ríkisendurskoðunar varðandi úttekt stofnunarinnar á IHS. Mennirnir voru ekki nafngreindir í tilkynningunni, en þetta eru þeir Jón Ingvar Pálsson forstjóri og Bragi Axelsson forstöðumaður IHS á Ísafirði.

Bragi Axelsson, forstöðumaður IHS á Ísafirði, rekur lögmannsþjónustuna og fasteignasöluna Officio lögmenn, sem staðsett er við Hafnarstæti á Ísafirði.

IHS annast innheimtu meðlaga í landinu og er með skrifstofur í Reykjavík og á Ísafirði. Samkvæmt Kveiki voru meðlagskröfur á einstaklinga árið 2020 tæplega 3,4 milljarðar króna.

Jón Ingvar neitaði Kveiki um að afhenda samninginn sem hann gerði fyrir hönd stofnunarinnar við fyrirtæki Braga og vísaði þar til trúnaðar og viðskiptastjónamiða.

Nýr stjórnarformaður IHS er Aldís Hilmarsdóttir, en eins og komið hefur fram, var allri stjórninni yfir stofnuninni skipt út vegna málsins. Hún segir í viðtali við Vísir.is að ekki sé grunur um lögbrot í málinu enn sem komið er. „Ef svo væri þá værum við að sjálfsögðu búin að kæra. Við erum bara enn þá að skoða þetta. Ef það kemur í ljós þá munum við vísa því til lögreglu,“ segir Aldís. Hún segir jafnframt að málið sé litið alvarlegum augum.