Rósa Elísabet Erlendsdóttir, sem býr á Breiðdalsvík, er afar ósátt við aðkomu að leiði ástvina í Heydalakirkjugarði, skammt frá Breiðdalsvík. Er hún vitjaði um leiði föðurbróður síns, sem lést 14 ára, og ömmu sinnar, sá hún að búið var að saga niður af trjám sem faðir hennar gróðursetti hjá leiðunum, niður í um 1,0-1,5 m frá jörðu. Kross á leiði ömmu Rósu er síðan brotinn og virðist Rósu sem tré, sem var afskorið, hafi fallið ofan á krossinn og hann brotnað þannig. Hún getur þó ekki staðfest það.
„Mér finnst ömurlegt að skemma svona og hafa ekki einu sinni samband við ættingja,“ segir Rósa í Facebook-færslu sem hún skrifaði um málið, og enn fremur:
„Ég er bara mjög sár og einnig reið yfir þessu og segi bara við þann sem vann þetta verk, þetta var mjög lélegt hjá þér skammastu þín.“
Í samtali við DV segir Rósa að hana gruni að margir íbúar séu ósáttir við umgengni starfsmanna kirkjugarðsins við leiði ástvina sinna eftir vinnu í garðinum undanfarið. Nefnir hún sem dæmi að maður einn hafi orðið fyrir því að þökulagt var yfir leiði ástvina hans, yfir blóm sem hann hafið gróðursett á leiðinu. Sjá meðfylgjandi mynd:
Rósa segist ennfremur ekki sjá gilda ástæðu fyrir því að tréin sem faðir hennar gróðursetti hafi verið söguð svo mikið niður. Þau hafi ekki verið ýkja há og ekki verið fyrir neinum.
Rósa segist ekki hafa fengið nein viðbrögð eftir að hún vakti athygli á þessu og hún sé engu nær um hvað hafi þarna gerst. Systir hennar sendi í gær fyrirspurn á formann sóknarnefndar á staðnum sem ekki hefur verið svarað.
Forsmaður sóknarnefndar er Svandís Ingólfsdóttir. Í samtali við DV sagðist hún ekki hafa komist í að kanna málið þar sem hún sé í öðru starfi og sóknarnefndarformennskan sé hlutastarf. Hún hafi því engar skýringar á þessari umgengni. Rósa muni þó án nokkurs vafa verða upplýst um hvað þarna hafi gerst og málið leyst í samvinnu við hana. „Ég þyrfti bara að komast þarna á staðinn í björtu,“ segir hún. „Ég veit að það var verið að taka brotin tré og allavega þarna en ég get ekki sagt neitt nákvæmlega um það. Ég get í rauninni ekki tjáð mig neitt um þetta við þig núna,“ segir Svandís ennfremur.
