Lögreglan á höfuðborgarsvæðinu leitar nú að konu sem keyrði á tvær unglingsstúlkur í Kópavogi í fyrrakvöld, 6. nóvember. Slysið mun hafa átt sér stað klukkan stuttu eftir klukkan átta að kvöldi til en tilkynning barst lögreglu um slysið klukkan 20:34.
Segir í tilkynningu lögreglunnar að konan hafi numið staðar á vettvangi, rætt við stúlkurnar og skutlað þeim svo í Mjóddina. Síðar þurftu þær að leita aðstoðar á slysadeild.
Í tilkynningu lögreglunnar segir jafnframt að mikilvægt sé að ökumenn gangi úr skugga um að engin meiðsl hafi hlotist af árekstrinum og að skemmdir hafi ekki orðið. „Sömuleiðis er áríðandi að tilkynna málið til lögreglu, ekki síst vegna þess að áverkar eru ekki alltaf sjáanlegir á vettvangi,“ segir þar jafnframt.
Konan er beðin um að hafa samband við lögreglu í síma 444 1000 og sömuleiðis þeir sem veitt geta nánari upplýsingar um málið. Einnig má hafa samband við rafn.gudmundsson@lrh.is.
