Héraðsdómur Reykjavíkur úrskurðaði nú í byrjun mánaðarins karlmann í fjögurra vikna gæsluvarðhald, eða til 30. desember vegna gruns um endurtekin brot gegn ákvæðum hegningarlaga er varða gripdeild og þjófnað.

Fram kemur í úrskurðinum að maðurinn er með tíu opin mál gegn sér í bókum lögreglu sem öll varða þjófnað á raftækjum. Í sakamálalögum segir að heimilt sé að úrskurða menn í gæsluvarðhald ef ætla má að einstaklingurinn muni halda áfram uppteknum hætti á meðan máli hans er ekki lokið eða rökstuddur grunur sé uppi um að hann hafi rofið skilyrði skilorðsbundins dóms.

Maðurinn sætti fyrst gæsluvarðhaldi frá 11. október til 1. desember síðastliðinn. Aðfaranóttina 3. desember, um einum og hálfum sólarhring eftir að honum var sleppt úr gæsluvarðhaldi var maðurinn handtekinn á heimili í Reykjavík grunaður um að hafa valdið eignaspjöllum og hótað heimilisfólki þar.

Auk framangreinds brots er maðurinn undir grun um að hafa í samtals átta skipti rænt raftækjum af verslunum í Reykjavík. Á meðal annars er maðurinn undir grun um að hafa stolið fartölvu, fartölvutösku, reiðufé, greiðsluposa og lyklum. Því til viðbótar er hann grunaður um að hafa stolið nokkrum rafmagnshlaupahjólum, spjaldtölvu, iPhone síma og fartölvu.

Sem fyrr segir þótti dómara við Héraðsdóm Reykjavíkur réttast að halda manninum í gæsluvarðhaldi þar til 30. desember eða samtals í fjórar vikur. Maðurinn áfrýjaði úrskurðinum til Landsréttar en vegna villu í áfrýjuninni var málinu vísað þaðan og fær því úrskurður héraðsdóms að standa.