Arnór Guðmundsson, forstjóri Menntamálastofnunar, segir að við fyrstu sýn virðist vinnubrögð, framsetning og ályktanir mannauðsfyrirtækisins Auðnast í mörgum tilvikum ekki standast faglegar og eðlilegar kröfur um nærgætni, hófsemd og stillingu við úrvinnslu mála af þessum toga.
Eins og kom fram í forsíðufrétt Fréttablaðsins í morgun fékk yfirstjórn Menntamálastofnunar og Arnór Guðmundsson forstjóri falleinkunn í áhættumati á starfsumhverfi stofnunarinnar sem unnið var af Auðnast. Matið var unnið að beiðni Menntamálaráðuneytisins en bráðabirgðaniðurstöður, sem Fréttablaðið hefur undir höndum, voru á þá leið að sjö af ellefu áhættuþáttum eru metnir rauðir innan stofnunarinnar , sem táknar óviðunandi áhættu sem nauðsynlegt er að bregðast við án tafar.
Í frétt blaðsins kom enn fremur fram að í niðurstöðunum segi orðrétt: „… núverandi stjórnarhættir hafa skapað óæskilegan starfsanda sem ógnar öryggi og heilsu starfsfólks.“ Öll atriðin tengjast stjórnun með beinum eða óbeinum hætti. Þá hefur meirihluti starfsfólks lýst yfir vantrausti á hendur forstjóranum, Arnóri Guðmundssyni.
Arnór vildi ekki tjá sig um málið þegar Fréttablaðið leitaði viðbragða hans. Í kjölfar fréttaflutningsins Menntamálastofnun frá sér eftirfarandi yfirlýsingu sem forstjórinn skrifar undir:
Menntamálastofnun telur rétt að fram komi að um tveggja ára skeið hefur hallað á starfsánægju hjá Menntamálastofnun og spilar þar inn í fjöldi þátta. Þannig hefur mennta- og menningarmálaráðuneytið t.d. ekki sett reglur sem lög mæla fyrir um og eiga að marka störfum stofnunarinnar almennan ramma. Stofnunin þarf að starfa innan ramma þröngra fjárheimilda. Þá hefur upplýsingagjöf ráðuneytis varðandi framhald tímabundinna verkefna skapað umtalsverðar áskoranir fyrir stofnunina. Hefur þetta ásamt yfirstandandi heimsfaraldi og öðrum ástæðum, sem óþarfi er að rekja hér, reynst krefjandi fyrir stjórnendur og starfsfólk stofnunarinnar.
Stofnunin vinnur að því hörðum höndum að bæta stjórnarhætti, starfsanda, og leiðrétta það sem aflaga hefur farið innan þeirra marka sem fjárlög og starfsheimildir setja. Stofnunin mun að sjálfsögðu taka sanngjarnt tillit til viðhorfa starfsmanna í þessum efnum og leggur áherslu á að endurvinna góðan árangur sem áður hafði náðst við að bæta starfsanda hjá stofnuninni og fyrri árangursmælingar hafa sýnt fram á.
Vegna umfjöllunar í fjölmiðlum um áhættumat Auðnast á starfsumhverfi Menntamálastofnunar skal áréttað að því miður virðist við fyrstu sýn sem vinnubrögð, framsetning og ályktanir Auðnast standist í mörgum atriðum ekki faglegar og eðlilegar kröfur um nærgætni, hófsemd og stillingu við úrvinnslu mála af þessum toga. Loks skal áréttað að góðar vonir eru um að fljótt megi ráða bót á þeim vandamálum sem uppi eru í nánu samstarfi við starfsfólk.
