Aðeins um 25 krónur af hverjum hundrað kalli sem ÁTVR selur fyrir af íslenskum bjór rennur í vasa framleiðandans. Þetta segir Laufey Sif Lárusdóttir, formaður Samtaka íslenskra handverksbrugghúsa í samtali við Viðskiptablaðið um helgina.
Þar var til umfjöllunar bág staða íslenskra handverksbrugghúsa, en aðilar að SÍHB eru nú á þriðja tug. Þá hefur DV heimildir fyrir því að vöruskortur og tafir á gámaflutningum yfir heimshöfin hafi leikið brugghúsin grátt. Sagði einn við DV að hann fengi ekki afhendar dósir. Annar sagðist ekki fá pláss fyrir fullan gám af hráefni og jólabjóravertíðin væri því í lausu lofti.
Úr umfjöllun Viðskiptablaðsins má lesa að staða fjölmargra brugghúsa sé slæm. Segir þar að eigið fé tveggja félaga af hverjum þremur hafi verið neikvætt í lok síðasta árs. Besta afkomu ársins, segir Viðskiptablaðið, átti Ölvisholt brugghús, en rekstrarfélag brugghússins skilaði tæpum 24 milljónum í hagnað, samanborið við 22 milljóna tap í fyrra, samkvæmt ársreikningi þeirra.
Ítarlegri umfjöllun um bága stöðu brugghúsanna, afkomu þeirra og tillögur SÍHB er að finna í Viðskiptablaðinu.
