Alþýðusamband Íslands setti 40 milljónir króna í auglýsingar fyrir síðustu kosningar. Þetta kemur fram í svari Höllu Gunnarsdóttur, framkvæmdastjóra ASÍ við fyrirspurn Markaðarins, viðskiptablaðs Fréttablaðsins.

Þar kemur jafnframt fram að Samtök atvinnulífsins hafi aðeins sett eina milljón króna.

Í samtali við Markaðinn segir Halla það ekkert óeðlilegt að ráðstafa fjármunum sambandsins með þeim hætti, enda hafi tilgangurinn verið að kalla eftir upplýsingum frá stjórnmálaflokkum. „Maður heyrir þau sjónarmið að svona samtök ættu ekki að vera að skipta sér af kosningabaráttu en ég er persónulega ósammála því. Við í ASÍ vinnum að almannahag og mér þykir bara eðlilegt að við köllum eftir upplýsingum frá stjórnmálaflokkunum. Með því reynum við að draga fram þá þætti sem skipta launafólk máli,“ hefur Markaðurinn eftir henni.

BSRB rak einnig sína eigin kosningaherferð í aðdraganda kosninga, en neitaði að veita upplýsingar um kostnaðinn við hana þegar Markaðurinn leitaði eftir því.

Árið 2007 tóku gildi lög um fjármál stjórnmálasamtaka og frambjóðenda. Eru þar að finna ítarlegar reglur um fjárframlög til stjórnmálaflokka, til dæmis hámarks fjárhæð styrkja til einstakra frambjóðenda og stjórnmálahreyfinga. Er þar jafnframt að finna bann við nafnlausum auglýsingum.

Hins vegar eru engar reglur á Íslandi um þátttöku í pólitískri umræðu og birtingu pólitískra auglýsinga hjá öðrum en beinum þátttakendum í pólitík, þ.e. áðurnefnd lög um fjármál stjórnmálasamtaka og frambjóðenda. Víða erlendis, og þá einna helst í Bandaríkjunum, hefur verið mikil umræða um einmitt slíkt. Þar hafa frambjóðendur og stjórnmálaflokkar sett upp svokallaða „PAC“ (e. political action committee) og farið þannig fram hjá reglum um hámarksfjárframlög til einstaka frambjóðenda og upplýsingaskyldu þeirra. Samskonar reglur er að finna víða um Evrópu.