Maður af erlendu bergi brotinn hefur verið ákærður fyrir skrautlegan þjófnað, meðal annars frá nágrönnum sínum. Ekki hefur tekist að birta manninum ákæru og er hún þess vegna birt í Lögbirtingablaðinu.

Maðurinn, sem er 23 ára gamall, er sagður hafa brotist inn í kjallaraíbúð í sama húsi og hann er skráður til heimilis í, í Hlíðahverfi í Reykjavík, og stolið þar margskonar búnaði: Fartölvu, fjórum ljósmyndavélum, heyrnatólum, sólgleraugum og GPS staðsetningartæki. Auk þess er hann sagður hafa stolið 10.000 krónum í reiðufé úr íbúðinni.

Þá er maðurinn sakaður um að hafa stolið höggborvél og aukarafhlöðu, samtals að verðmæti um 116 þúsund krónur, frá Stéttarfélaginu ehf. að Breiðhellu í Hafnarfirði.

Málið verður tekið fyrir í Héraðsdómi Reykjavíkur þann 24. mars næstkomandi. „Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það sem hann er ákærður fyrir og dómur verði lagður að honum fjarstöddum,“ segir í fyrirkallinu sem birt er í Lögbirtingablaðinu.