Það vakti mikla athygli fyrr í sumar þegar bandaríski fjölmiðillinn Vice svipti hulunni af alþjóðlegum skóla Íslendingsins Guðnar Guðnasonar, The Modern Mystery School, þar sem því er haldið fram að um einskonar „költ“ sé að ræða þar sem peningar og kynlíf eru aldrei langt undan, eins og sagt var í frétt RÚV.
Guðni býr og starfar í Japan en skóli hans teygir anga sína víða um heim. Grein Vice byggðist að stórum hluta á umfangsmikilli grein DV frá árinu 2016 þar sem farið var yfir ótrúlegt lífshlaup Guðna og vafasama leyndardóma hans.
Guðni er afar virkur á Facebook en brást ekki við ásökunum Vice með nokkrum hætti. Hann hefur þó síðar minnst á það í færslum sínum að hann verði oft sinnis fyrir árásum en að þær megi rekja til afbrýðisemi annarra.
Í dramatískri færslu sem ber yfirskriftina „Þú átt sex mánuði eftir ólifaða“ sem Guðni birti í vikunni lýsir hann komandi baráttu sinni við krabbamein.
Frásögnin byrjar á því að Guðni hafi fyrir 40 árum lesið sér til um prótínið interferon sem að hans sögn getur grætt allt, þar á meðal krabbamein og mögulega Covid-19.
„Ég var heillaður og safnaði hverri einustu grein sem ég fann á Íslandi og í London. Loksins fann ég síðan læknastofu [í Japan] sem var tilbúin í að dæla efninu í mig og bæta þar með ónæmiskerfi mitt,“ skrifar Guðni.
Til þess að mega undirgangast meðferðina þurfti Guðni að sýna fram á að hann þjáðist ekki af krabbameini sem hann og gerði ásamt Eiko, japanskri eiginkonu sinni.
Skömmu síðar tilkynnti japanskur læknir honum í gegnum Zoom að krabbamein á fjórða stigi hefði dreifst um allan líkama Guðna og að hann ætti sex mánuði eftir ólifaða.
Eðli málsins samkvæmt var um gríðarlegt áfall að ræða fyrir hjónin og því tóku við svefnlausar nætur. Í kjölfarið tóku við frekari rannsóknir á öðrum spítala sem leiddu í ljós að ástandið var ekki eins alvarlegt og í fyrstu var haldið. Guðni var vissulega með illvígt krabbamein í blöðruhálskirtli en það var enn staðbundið.
„Ég var brjálaður út í fyrsta lækninn sem ég leitaði til. Af hverju lét hann mig ganga í gegnum þetta að ástæðulausu,“ skrifar Guðni.
Hann segist byrja í krabbameinsmeðferð í næstu viku. „Ég held að ég muni ekki líta illa út sköllóttur,“ skrifar Guðni og slær á létta strengi.
„Ég er kominn í Krabbameinsklúbbinn en ég mun ekki gefast upp. Ég mun berjast gegn þessu sníkjudýri sem hefur gert innrás inn í líkama minn því þegar allt kemur til alls er ég stríðsmaður. Ég elska ykkur öll og ég elska Eiko, ég elska lífið og vinnuna mína og ég ætla að vera til staðar eins lengi og ég get,“ skrifar Guðni með tilfinningaríkum hætti.
