Handboltastjarnan Aron Pálmarsson freistar þess nú að selja fallega íbúð í Urriðaholtinu í Garðabæ. Íbúðin, sem er í fjölbýlishúsi við Holtsveg 18, er 111,1 fermetrar að stærð og er ásett verð 60,9 milljónir króna. Íbúðina keypti Aron í gegnum eignarhaldsfélag sitt AP24 ehf., í maí 2018 og var kaupverðið 51,5 milljónir króna og hefur íbúðin verið í útleigu.

Athygli vekur að húsið við Holtveg 18 er afar vinsælt meðal afreksíþróttamanna. Þannig býr handboltagoðsögnin Guðjón Valur Sigurðsson í stigaganginum ásamt fjölskyldu sinni og þá á besti körfuboltamaður landsins, Martin Hermannsson, einnig íbúð í húsinu ásamt unnustu sinni, Önnu Maríu Bjarnadóttur.

Þess má geta að aðeins sex íbúðir eru í stigaganginum og því verður að segjast að  hlutfall afreksíþróttamanna er óvenjuhátt í húsinu.

Martin sagði frá því í skemmtilegu og óvenju opinskáu viðtali við Morgunblaðið í fyrra að hann og Anna María ættu íbúðina skuldlaust. Var það ekki síst til að sýna fólki fram á að það væru víðar góð laun en bara í fótboltanum.

Hér er hægt að fá frekari upplýsingar um íbúðina sem Aron er að selja