Björk Eiðsdóttir, ritstjóri helgarblaðs Fréttablaðsins, fjallar um svokallaða „cancel culture“ eða útskúfunarmenningu í tengslum við nýja #metoo-byltingu í leiðara Fréttablaðsins í dag. Leiðarinn ber yfirskriftina „Hinir útskúfuðu.“
Hún segir að gjalda skuli varhug við því að útskúfa einstaklinga sem teljast hafa hagað sér á umdeildan hátt. Hún segist jafnframt sannfærð um að hún eigi ekki eftir að fá allt of mörg „læk“ fyrir þessi skrif.
Björk hefur leiðarann svo:
„Ég er kona.
Ég hef upplifað kynferðislega áreitni af hálfu karla í mínum innsta hring.
Ég hef upplifað að aðili, sem ég var í nánu sambandi við, fór yfir mörk mín.
Ég hef upplifað bæði andlegt og líkamlegt ofbeldi í nánu sambandi.
Ég er kona með rödd og vald sem sannast best á því að þú, líklega án þess að þekkja mig, ert nú að lesa vangaveltur mínar.
Af þessum ástæðum tel ég mig mega segja það sem ég ætla að segja. Og í raun tel ég mig knúna til þess. Vitandi að ólíklegt sé að á veraldarvefnum muni þessi pistill hrúga að sér „lækum“, og mögulega skrifi ég hér með undir vist mína meðal hinna útskúfuðu.“
Hún segir tilgang umræðunnar í kring um #metoo-bylgjuna vera að vekja athygli á og uppræta kynbundið ofbeldi. Konur séu orðnar langþreyttar á að ofbeldi viðgangist enn í svo ríkum mæli og erfitt sé að fá réttláta málsmeðferð í dómskerfinu.
Þá spyr hún hvort tilgangurinn helgi meðalið, og hvort við viljum að með ásökun einni sé aðilum refsað með útskúfun.
„Ég segi nei og finnst við verða að spyrja okkur eðlilegra spurninga er þetta varðar. Við verðum að eiga samtalið og það má ekki bara vera í eina átt,“ segir hún.
„Og nei, ég er ekki haldin gerendameðvirkni. Ég er aftur á móti skíthrædd við útskúfun án samtals og þá staðreynd að við, sem hugsandi fólk, þorum ekki lengur að tjá okkur af ótta við eilífðarvist meðal hinna útskúfuðu,“ skrifar Björk.
