Ungmenni skemmtu sér í gær með því að kasta snjóboltum á höfuðborgarsvæðinu. Á einum stað endaði þetta hálf illa því rúða brotnaði í anddyri húss þegar snjóbolta var kastað í hana. Síðdegis í gær var lögreglunni tilkynnt um konu á ferð í vesturhluta borgarinnar og væri hún með innkaupakerru fulla af verkfærum. Hvorki konan né kerran fundust.

Eitt heimilisofbeldismál er til rannsóknar eftir næturvaktina. Á fjórða tímanum í nótt var maður handtekinn í miðborginni í kjölfar húsbrots. Hugsanlegt þýfi fannst í fórum hans. Hann var vistaður í fangageymslu.

Þrír ökumenn voru handteknir á höfuðborgarsvæðinu í gærkvöldi og nótt grunaðir um að vera undir áhrifum áfengis og eða fíkniefna. Einn ökumaður var kærður fyrir að vera með röng skráningarnúmer á bifreiðinni sem hann ók.

Lögreglan fjarlægði óvelkominn mann af Landspítalanum í gærkvöldi og kom honum í viðeigandi úrræði eins og segir í dagbók lögreglunnar.