Mbl.is greindi frá því í gærkvöldi að ung kona hafi verið bitin í andlitið af hundi á skemmtistaðnum Röntgen. Sérstaklega var tekið fram í fyrirsögninni að um væri að ræða Rottweiler-hund.
Hallgerður Hauksdóttir, formaður Dýraverndarsambands Íslands, segir í samtali við blaðamann að svona gerist ekki upp úr þurru og að þarna hafi hundurinn verið settur í aðstæður sem hann greinilega réði ekki við.
„Það þarf að vera alveg á hreinu að hundar ráðast ekki á fólk upp úr þurru eins kom fram í fréttaflutning á öðrum miðlum. Það verður að vera eitthvað áreiti. Hundar eiga líka ekki heima í aðstæðum sem þessum, fólk með áfengi, há tónlist, þetta er of mikið áreiti ef þeir eru ekki sérstaklega þjálfaðir. Það er frábært að hundar megi koma inn á kaffihús og veitingastaði en skemmtistaðir er ekki heimili fyrir alla hunda,“ segir Hallgerður.
Heiðrún Klara Johansen, hundaþjálfari og hundaatferlisfræðingur, tekur undir orð Hallgerðar. Hún segir að hundar eigi ekki heima á skemmtistöðum, sérstaklega þegar eigendur hafa áfengi við hönd, og að það þurfi að setja ákveðna línu hver munurinn sé á kaffihúsi og veitingastöðum. Það sé mikill munur fyrir hundinn að sitja á rólegum stað með eiganda sínum og á að vera þar sem mikið er af fólki með háa tónlist í gangi.
Heiðrún segir það ekki skipta máli hvers tegundar hundurinn er og með því að taka það fram í fyrirsögn sé verið að reyna að ala upp ótta gegn ákveðinni tegund. Hundurinn hafi ekki bitið í andlit stelpunnar vegna þess að hann er Rottweiler heldur vegna þess að hann var í aðstæðum sem honum leið ekki vel í.
Samkvæmt vitni að atvikinu þá var konan að klappa hundinum þegar ölvaður maður stígur á löppina á honum. Hundurinn hefur þá talið að konan hafi verið að gera sér illt og talið sig vera í hættu.
