Þórólfur Guðnason, sóttvarnarlæknir, telur að í ljósi fjölgunar greindra tilvika COVID-19 undanfarna daga að skoða þurfi takmarkanir sem gilda um vínveitingastaði í Reykjavík. Sérstaklega þar sem um þriðjungur þeirra þrjátíu og tveggja sem greinst hafa undanfarna tvo daga eru með smit sem rakin eru til slíkra staða.

„Skoða það betur og sérstaklega í ljósi þess að vínveitingastaðir virðast klárlega eiga stóran þátt í þeirri bylgju sem við erum að kljást við núna,“ sagði Þórólfur á upplýsingafundi almannavarna í dag.

Ætlar hann að leggja fram tillögur til ráðherra í dag eða á morgun varðandi aðgerðir til að takast á við stöðuna, líklega munu þær varða staðbundnar aðgerðir á höfuðborgarsvæðinu sem sérstaklega verður beint að veitingastöðum.

„Þessir staðir líklegri, eða fólkið sem er á þessum stöðum, er líklegra til að smitast og smita hvert annað.“

Þórólfur telur vænlegt að fara þá leið fremur en að herða aðgerðir á landinu öllu, einkum í ljósi þess að flest smit undanfarna daga mega rekja til höfuðborgarsvæðisins og að fæstir sem greindust voru í sóttkví.