Í frétt RÚV í gærkvöld um Konráð Hrafnkelsson, sem ekkert hefur spurst til síðan á fimmtudag, segir að ekki sé talið að hann sé í hættu. „Ekki er talið að Konráð sé í hættu,“ segir í fréttinni og er það ekki skýrt frekar.

DV greindi fyrst frá málinu á laugardaginn, skömmu fyrir hádegi. Eins og þar kemur fram hefur ekki spurst til Konráðs síðan um níuleytið á fimmtudagsmorguninn. Síðast sást til hans á McDonalds-veitingastað í miðborg Brussel. Konráð er 1,78 m á hæð, var klæddur í bláar gallabuxur og hvíta Nike-skó. Hann var með bakpoka og húfu á höfði (hvorttveggja dökkt) og svört Marshall heyrnartól. Meðferðis hafði hann blátt reiðhjól, sem einnig er horfið.

Konráð stundar flugnám í Belgíu. Samkvæmt frétt RÚV átti hann að fara í próf þennan morgun.

DV hafði samband Karl Steinar Valsson, yfirmann miðlægrar rannsóknardeildar lögreglunnar á höfuðborgarsvæðinu. Hann segir þá staðhæfingu RÚV, að ekki sé talið að Konráð sé í hættu, ekki frá íslensku lögreglunni komna:

„Við höfum ekkert tjáð okkar um það. Það eina sem ég get tjáð mig um varðandi þetta mál er að það er komið til okkar og við erum í samskiptum við belgísk yfirvöld sem hafa forræði yfir málinu. Ég veit ekkert um þessa skoðun. Forræði málsins er í Belgíu og við erum í samvinnu við þá, við erum að aðstoða þá eins og við getum út frá okkar þætti en það er mjög óeðlilegt að við séum að tjá okkur um það hvernig þessu máli er háttað. Ég myndi ekki kunna við að eitthvert annað lögreglulið, sem væri ekki með alla þræði í málinu, væri að tjá sig um hvernig staðan í því er. Það er það sem ég sagði við RÚV,“ sagði Karl Steinar.

Þeir sem kunna að hafa upplýsingar um ferðir Konráðs eru beðnir um að hafa samband í gegnum netfangið Info.konni92@gmail.com.

Sjá nánar meðfylgjandi tilkynningu á Instagram.