Landsréttur staðfesti í gær gæsluvarðhaldsúrskurð Héraðsdóms Reykjavíkur yfir manni sem meðal annars er grunaður um líkamsárás á lögfræðing sinn og alvarlega árás á konu.

Maðurinn er grunaður um að hafa þann 9. júní ruðst inn á lögmannsstofu, tekið lögmann kverkataki og hótað starfsfólki lífláti. Fjöldi vitna var að atvikinu. Hótanir mannsins beindust gegn lögmanninum og starfi hans og er í rannsókn hjá embætti héraðssaksóknara. Þurfti að hringja í neyðarlínu út af framferði mannsins.

Þá er maðurinn grunaður um að hafa slegið konu í andlitið með hátalara þann 11. júní með þeim afleiðingum að hún hlaut áverka á vinstra augnloki, sár á efri, stórt sár á innra byrði efri varar, eymsli í tönnum og tognun í hálsi og herðum. Málið er í rannsókn en maðurinn hefur játað sök.

Þá er maðurinn grunaður um alvarlegar hótanir gegn barnsmóður sinni í nóvember og desember 2019. Liggja fyrir upptökur af grófum hótunum.

Maðurinn skal sæta gæsluvarðhaldi til 18. ágúst.