Bifhjólasamtök lýðveldisins, Sniglarnir, boða til samstöðufundar mótorhjólamanna á morgun kl 13:00 í porti Vegagerðarinnar í Borgartúni. Áður höfðu félagasamtökin boðað til mótmælafundar sama efnis, en nú er yfirskriftin samstöðufundur.

Með þessu vilja mótorhjólasamtökin „sýna hinum látnu virðingu og mótmæla þeim slysagildrum sem víða leynast með þöglum mótmælum.“ Bergþóra Þorkelsdóttir, forstjóri Vegagerðarinnar, hefur, að sögn tilkynningar Sniglanna, búið svo um hnútana að hliðið að portinu verður opið og aðgengilegt þeim sem vilja mæta og sýna Sniglunum og þeirra málstað samstöðu.

Bergþóra sagði í kvöldfréttum RÚV að Vegagerðin myndi axla ábyrgð á því sem misfórst þegar mikil hálka myndaðist á nýlögðu malbiki á Kjalarnesinu. Eru vegaaðstæður þessar taldar eiga þátt í dauða tveggja mótorhjólamanna í slysi í gær.

Segir í tilkynningunni:

Mótorhjólmenn trúa því að með samvinnu og upplýsingamiðlum megi ná árangri svo hörmuleg mótorhjólslys, eins og það sem átti sér stað í gær, heyri sögunni til.  Í því sambandi þurfa bæði veghaldarar og mótorhjólamenn að taka höndum saman svo árangur náist. Mótorhjólamenn sjálfir þekkja best hvernig taka má á þessum málum og vilja koma sínum hugmyndum á framfæri.