Fréttablaðið skýrir frá þessu. Fram kemur að málið hafi verið tekið fyrir hjá dómstól GSÍ eftir að ákvörðun aga- og forgjafarnefndar Golfklúbbs Akureyrar var kærð. Í dómnum kemur fram að Sturla hafi leikið þrjá hringi í lok júlí þar sem skráður ritari spilaði ekki með þann daginn. Foreldrar Sturlu staðfestu þess í stað skorkort hans. Sturla viðurkenndi að hafa sent skorkortið til foreldra sinna og þannig gert mistök en sagði að niðurstaða hringjanna þriggja hefði verið rétt skráð.
Það vakti grunsemdir að meðal hringjanna var besti hringur sumarsins en þá lék Sturla á pari vallarins. Sturla viðurkenndi að hafa hætt leik eftir tvær holur en hafi klárað hringinn síðar þennan sama dag og þá einsamall.
Dómstóll GSÍ telur að ábyrgðin liggi hjá Sturlu og ekki væri hægt að líta á það til refsilækkunar að hann hefði starfað fyrir GSÍ og PGA-samtökin á Íslandi. Um ítrekuð og alvarleg brot væri að ræða á reglum um forgjöf og staðfesti dómstóllinn tólf mánaða keppnisbann og niðurfellingu forgjafar Sturlu.
