Frönsk lögregla greindi frá því í morgun að kona hafi verið afhöfðuð og að tveir aðrir séu látnir í hnífaárás í frönsku borginni Nice. Fjöldi manns er særður eftir árásina.

Christian Estrosi, borgarstjóri Nice, sagði á Twitter að árásarmaðurinn hafi öskrað „Allahu Akbar“ er hann lét til skarar skríða. „Allt bendir til þess að um hryðjuverk hafi verið að ræða,“ sagði Estrosi.

Árásarmaðurinn var skotinn af lögreglu á meðan á handtöku hans stóð, en er á lífi, að því er fram kemur á vef Sky News.

Emmanuel Macron, Frakklandsforseti, mun vera á leið til borgarinnar síðar í dag. Þá sagði Gerald Darmanin, innanríkisráðherra landsins, að lögregluaðgerð væri í gangi í borginni og hvatti fólk til að halda sig frá athafnasvæði lögreglu. Neyðarfundur fer nú fram í ráðuneytinu vegna árásarinnar.

Franski saksóknarinn sem sér um saksókn hryðjuverka hefur verið beðinn um að rannsaka atburði dagsins. Ekki er talið að árásarmaðurinn hafi átt sér vitorðsmenn, en það verður þó hluti af rannsókninni að kanna slíka möguleika.

Frönsk lögregla var þegar á hæsta viðbúnaðarstigi vegna sambærilegrar árásar sem átti sér stað í París fyrr í þessum mánuði. Var þar um að ræða árás á Samuel Paty, grunnskólakennara í París. Mun tilefni árásarinnar hafa verið birting Paty á teiknimyndum af Múhammeð spámanni.