Á fyrstu átta mánuðum ársins veitti Sýslumaðurinn á höfuðborgarsvæðinu 503 leyfi til hjónaskilnaða eða tæplega 63 leyfi í hverjum mánuði. Allt árið í fyrra voru 752 leyfi veitt eða 63 á mánuði. Árið 2018 voru leyfin 769.

Fréttablaðið skýrir frá þessu í dag og vísar í svar sýslumanns við fyrirspurn blaðsins. Fram kemur að fram til 1. september hafi verið veitt 217 leyfi til skilnaðar að borði og sæng, 204 leyfi til lögskilnaðar að undangengnum skilnaði að borði og sæng og 82 leyfi til beins lögskilnaðar án þess að skilnaður að borði og sæng kæmi við sögu.

Hvað varðar staðfesta samninga um forsjá og meðlaga vegna sambúðarslita þá voru þeir 154 fyrstu átta mánuði ársins en það er svipaður fjöldi og tvö síðustu ár.