Héraðsdómur Norðurlands eystra hefur birt ákæru yfir þrítugum manni í lögbirtingablaðinu. Segir þar að málið verði dómtekið þann 9. desember þessa árs í dómshúsinu á Akureyri. Í birtingunni er ákærði kvaddur til þess að koma, hlýða á ákæru, halda uppi vörnum og sæta dómi. Sæki ákærði ekki þing getur sá ákærði átt von á því að fjarvist hans verði lögð að jöfnu við játningu.

Svo virðist sem upphafleg ákæra hafi verið gefin út í nóvember í fyrra, eða fyrir rétt tæpu ári síðan. Síðan þá hefur maðurinn ekki fundist til að hægt sé að birta honum ákæruna, og er því brugðið á það ráð að birta hana í lögbirtingablaðinu, samkvæmt lögum þar um.

Í ákærunni er maðurinn sagður hafa ráðist að eiginkonu sinni í íbúð þeirra á Akureyri, slegið hana í andlitið með flötum lófa, rifið í hár hennar og kýlt hana svo ítrekað í höfuðið með krepptum hnefum beggja handa. Maðurinn mun þar að auki hafa hótað henni lífláti ef lögreglan kæmi á staðinn, hótað því að henda henni fram af stétt sem þau stóðu á og niður á plan sem er þar fyrir neðan, hótað konunni og fjölskyldu hennar lífláti ef hann yrði handtekinn eða hann yrði sendur úr landi. Munu hótanir þessar hafa farið fram son konunnar sem er á unglingsaldri.

Konan hlaut af þessu talsverða áverka. Krefst hún bóta úr hendi mannsins að fjárhæð 1.500.000 króna auk vaxta og verðbóta, auk þess sem hún krefst þóknunar úr hendi mannsins vegna málskostnaðar. Ákæruvaldið krefst refsingar yfir manninum, auk þess sem hann verði dæmdur til að greiða málskostnað vegna málsins.