Árið 2016 barst lögreglu ábendingu um að tveir grunsamlegir menn hafi sést haldandi á rænulitlum manni á milli sín í Vestmannaeyjum 20. nóvember árið 1974. Sjónarvotturinn taldi mennina tengjast Landsvirkjun. Lögreglan í Vestmannaeyjum rannsakar enn þessa ábendingu en talið er að lýsingin gæti átt við Geirfinnur Einarsson.
Fréttablaðið greinir frá þessu. Umrætt vitni sagðist í skýrslutöku hafa séð þrjá „borgaralega klædda“ menn koma á smábáti til Vestmannaeyja um miðjan dag þann 20. nóvember 1974. Það er degi áður en Geirfinnur hvarf í Keflavík. Að sögn vitnisins leiddu tveir menn í jakkafötum þann þriðja á milli sín og virtist sá þriðji rænulítill. Mennirnir þrír eru sagðir hafa farið inn í verbúð en þar bjó umrætt vitni á þeim tíma.
Þremenningarnir dvöldu samkvæmt honum í dágóðan tíma í lokuðu herbergi en það var kokkurinn í mötneyti verbúðarinnar sem hleypti þeim inn. Vitnið segist hafa átt stutt orðaskipti við þremenningana þegar þeir gengu út úr herberginu. Hann hafi spurt þann rænulitla hvort ekki væri allt í lagi. Sá svaraði þá: „Mundu eftir mér.“ Mennirnir í jakkafötunum gáfu þá í skyn að þeir myndu taka vitnið líka en svo varð ekki.
Því næst segist vitnið hafa séð þremenningana fara um borð í trillu og sigla frá bryggjunni. Þegar farið var að rökkva sá hann trilluna koma í land og þá var einungis mennirnir í jakkafötunum um borð. Nánar má lesa um þessa lýsingu vitnisins hér.
