Á upplýsingafundi Almannavarna í dag var Þórólfur Guðnason sóttvarnalæknir spurður út í stöðu þeirra sem glíma við langtímaeinkenni og veikindi eftir að hafa læknast af COVID-19. Svo virðist sem þessi hópur sé stærri en áður var talið en ekki liggur fyrir hvað  hlutfallið er stórt. Margt af þessu fólkið glímir við mjög alvarleg og langvarandi einkenni.

Þórólfur sagðist ekki geta gert meira í málum þessa fólks, það væri hlutverk heilbrigðiskerfisins að sinna þeim sem glíma við þessi veikindi. Hann telur að heilbrigðiskerfið sé að gera sitt besta til að sinna þessum hópi.

Tveir greindust með COVID-19 í gær og var hvorugur í sóttkví. Þórólfur fór yfir það á fundinum að kúrfan væri á niðurleið en smit undanfarið hafa verið 0-2 á dag. Ekki hafa komið fram neinir nýir stofnar veirunnar.

Sóttvarnareglur verða endurskoðaðar næst þann 27. september. Sagði Þórólfur góðar vonir til að hægt verði að slaka á samkomutakmörkunum hér innanlands en mikilvægt sé samt að fara varlega í þeim efnum og stíga lítil skref í einu.