Vel á annað hundrað ökumenn hafa verið kærðir fyrir of hraðan akstur í umdæmi lögreglunnar á Suðurnesjum það sem af er vikunni. Langflestir óku of hratt í nágrenni grunnaskóla þar sem lögregla hefur verið með umferðareftirlit eftir að skólarnir byrjuðu.

Í tilkynningu frá lögreglunni á Suðurnesjum kemur fram að þetta hafi ekki átt  við alls staðar því umferð við marga skólanna var til mikillar fyrirmyndar þar sem allir ökumenn voru í bílbeltum og á löglegum hraða  og börn á vespum eða reiðhjólum með hjálma.

Af viðbrögðum fólks má ráða að mikil ánægja ríkir með sýnileika lögreglu við skólana.