Flugakademía Keilis og Flugskóli Íslands hafa sameinast í stærsta flugskóla landsins undir nafninu Flugakademía Íslands. Skólinn verður eftir sameiningu einn sá stærsti á Norðurlöndunum með á annan tug kennsluvéla, flughermi og veglega kennslu og þjálfunaraðstöðu.

Mun skólinn stunda kennslu til jafns í Hafnarfirði og á Ásbrú í Reykjanesbæ og verða verklegar æfingar á bæði Keflavíkurflugvelli og Reykjavíkurflugvelli. Þetta kemur fram í tilkynningu hins nýstofnaða flugskóla.

Þar er haft eftir Arnbirni Ólafssyni, forstöðumanni markaðs og alþjóðasviðs skólans: „Á undanförnum árum hafa fjölmargir erlendir nemendur ákveðið að leggja stund á atvinnuflugnám á Íslandi, enda kjöraðstæður á landinu til flugnáms sem eru einstakar á heimsvísu. Ísland er svokallað „open-sky“ sem þýðir að það eru engin höft eða lokuð svæði fyrir kennsluflug. Nemendur fá þannig verklega þjálfun við krefjandi aðstæður og tækifæri til að fljúga á einhverja áhugaverðustu flugvelli sem völ er á. Mannauðurinn sem við búum yfir er líka okkar mikilvægasta eign enda eru allir kennarar okkar stútfullir af reynslu og þekkingu.“

Í júní útskrifaðist fjölmennasti bekkur atvinnuflugmanna í sögu skólans eða 78 flugmenn og er einn bekkur í haust þegar fullmannaður. Opnað hefur verið fyrir umsóknir í annan bekk og rennur umsóknarfrestur í hann út 15. ágúst.