Samkomubann sem sett var til 13. apríl verður framlengt út apríl hið minnsta. Seinni hluta mánaðarins verður ákvörðunin endurskoðuð. Þetta kom fram í máli Þórólfs Guðnasonar sóttvarnalæknis á upplýsingafundi um COVID-19.
85 ný smit voru greind síðasta sólarhringinn en óvenjumörg sýni voru tekin, eða um 1500. Svörun í sýnatöku veirufræðideildarinnar var 9% en tæplega 1% hjá Íslenskri erfðagreiningu.
Smitin eru þá orðin 1220. Tíu manns eru í öndunvarvél núna.
Nánari tölfræði um smit er á vefnum covid.is.
Þórólfur segir vonir standa til að toppi í faraldrinum verði náð fyrri hluta apríl. Tekist hafi vel til með að sveigja faraldurinn frá veldisvexti. Yfir 50% greindra höfðu áður verið í sóttkví og er samfélagslegt smit lítið en þó nógu mikið til að valda álagi á sjúkrahúsin, sérstaklega á gjörgæslur. Þess vegna hefur verið ákveðið að framlengja samkomubannið. Möguleiki er á því að það verðu lengur en út apríl en það verður skoðað er líða fer á mánuðinn.
