Íslensk hjón, Hallur Metúsalem Hallsson og Margarita Hallsson, eru nú stödd um borð í skemmtiferðaskipinu MS Zaandam sem liggur við akkeri í Panama. Um 150 manns um borð í skipinu eru talin vera smituð. Þetta kemur fram í frétt á RÚV.

Samkvæmt fréttinni eru hjónin vongóð um að vera ekki smituð en þau finna ekki til einkenna og hafa haldið sig á klefa sínum. Vonast hjónin til að komast frá borði fljótlega.

Hallur segir meðal annars við RÚV:

„Auðvitað bregður manni við og það er áfall. Það er svo sem ekki meira um það að segja, maður finnur bara til með fólkinu. Þetta er búið að vera eins og ein stór fjölskylda hérna um borð.

Við erum bara búin að pakka niður á mettíma og við sitjum nú með grímur fyrir vitunum, bíðum eftir að það verði bankað og okkur sagt að yfirgefa skipið. Það sem tekur við er örugglega áframhaldandi einangrun.“