Fyrrverandi gjaldkeri Ungmennafélags Grundarfjarðar (UMFG) hefur verið ákærður af héraðssaksóknara fyrir fjárdrátt upp á 12.337.897 krónur af reikningum ungmennafélagsins. Þetta kemur fram í frétt í Morgunblaðinu í dag. Um er að ræða meintar millifærslur af reikningum félagsins yfir sex ára tímabil, frá 2011 til 2017. Er gjaldkerinn sagður hafa flutt peninga af reikningum félagsins yfir á eigin reikninga og yfir á reikninga ófjárráða dóttur sinnar. Millifærslunar voru alls 248. Voru hæstu millifærslurnar upp á 250 þúsund krónur.
Ungmennafélagið kærði gjaldkerann fyrir rúmu ári síðan. DV greindi þá frá. Þar segir: „Heimildir DV herma að meintur fjárdráttur telji milljónum króna og málið hafi komist upp síðasta sumar. Málið kom inn á borð Héraðssaksóknara í vor, Ólafur Þór Hauksson saksóknari staðfesti það en vildi ekki staðfesta meinta upphæð.“
