Tveir af þeim þremur sem voru í bifreið sem fór út af veginum í Hnífsdal á föstudag voru ekki í bílbeltum. Bifreiðin lenti á ljósastaur og fór í framhaldinu að minnsta kosti eina veltu.

Í skeyti frá lögreglunni á Vestfjörðum kemur fram að allir þrír hafi verið fluttir á Fjórðungssjúkrahúsið á Ísafirði. Einn var metinn alvarlega slasaður og var hann fluttur með sjúkraflugi til Reykjavíkur þar sem hann gekkst undir aðgerð á höfði. Að sögn lögreglu er hann enn á sjúkrahúsi en þó úr lífshættu. Hinir tveir voru útskrifaðir af sjúkrahúsinu á Ísafirði morguninn eftir slysið.

„Rannsókn á tildrögum slyssins er í fullum gangi af hálfu lögreglunnar á Vestfjörðum og Rannsóknarnefndar samgönguslysa og því ekki hægt að gefa upp frekari upplýsingar að svo stöddu. Ljóst er að sá sem minnst slasaðist var með öryggisbelti spennt þegar slysið varð. Svo mun ekki hafa verið með hina tvo,“ segir lögregla.