Í byrjun júlí var tæplega einu tonni af bjór stolið úr húsnæði Fjölsmiðjunnar á Akureyri. Í húsinu er rekið félagslegt úrræði fyrir börn og ungt fólk og var ekkert eftirlitskerfi í húsinu. Í Fjölsmiðjunni hefur verið unnið við pökkun fyrir Coca Cola European Partners síðan síðasta vetur og því var mikið magn af bjór í húsnæðinu.

Fréttablaðið skýrir frá þessu. Fram kemur að Fjölsmiðjan sé vinnusetur fyrir ungt fólk á aldrinum 16 til 24 ára. Þetta unga fólk stendur á krossgötum í lífinu að því að Fjölsmiðjan segir og gefst því tækifæri til að þjálfa sig fyrir almennan vinnumarkað eða nám hjá Fjölsmiðjunni.Unnið er til klukkan 15 á daginn í húsnæðinu og fær unga fólkið greiddan verkþjálfunar- og námsstyrk.

Fréttablaðið hefur eftir lögreglunni á Akureyri að rúmlega 1.900 hálfs lítra bjórdósum hafi verið stolið úr húsinu. Þarna var um að ræða fimm bjórtegundur frá Víking. Í heildina var því um tæpt tonn af bjór að ræða en þjófnaðurinn átti sér stað aðfaranótt 2. júlí. Rannsókn lögreglunnar leiddi til þess að megnið af bjórnum fannst um kvöldið og var einn yfirheyrður vegna málsins. Málið er enn til rannsóknar.

Erlingur Kristjánsson, forstöðumaður Fjölsmiðjunnar, sagði í samtali við Fréttablaðið að unnið hafi verið við pökkun á gjafaöskjum fyrir Víking og hafi samstarfinu verið haldið áfram þrátt fyrir þjófnaðinn. Í kjölfar hans hafi verið ákveðið að setja upp eftirlitsmyndavélar í húsnæði Fjölsmiðjunnar.