Karl og kona létu lífið eftir íkveikju á efri hæð íbúðarhúss á Selfossi síðasta haust. Tveir aðilar komust lifandi út úr brennandi húsinu. Þessir aðilar voru í annarlegu ástandi og voru handteknir skömmu síðar.
Vigfús Ólafsson er ákærður fyrir að hafa orðið fólkinu að bana með því að kveikja í húsinu af ásetningi en konan er ákærð fyrir að hafa ekki gert tilraun til að vara fólkið við. RÚV greindi frá þessu í kvöldfréttum.
Vigfús er ákærður fyrir bæði manndráp af ásetningu og íkveikju en einnig er hann ákærður fyrir manndráp af gáleysi og íkveikju til vara.
Vigfús sat við drykkju í húsinu þegar þetta gerðist og segist lítið muna eftir atburðarásinni.
Kolbrún Benediktsdóttir saksóknari segir hæfilega refsingu yfir Vigfúsi geta verið allt að 18 ára fangelsi.
Kolbrún segir þetta vera fordæmalaust mál þar sem aldrei áður hafi einhver verið ákærður fyrir manndráp á tveimur einstaklingum í einu.
Verjandi Vigfúsar krafðist sýknunnar. Hann segir að Vigfús hafi kveikt eld í pappakassa í kjöltu sinni en ekki til að skaða aðra, heldur sjálfan sig.
Auk þess er engin sönnun fyrir því að Vigfús hafi kveikt í gardínunum en talið er að þær hafi valdið eldsvoðanum.
Réttarhaldinu lauk í dag og verður dómur kveðinn upp þann 9. júlí.