Ríkisskattstjóri mun ekki senda fjölmiðlum upplýsingar um hæstu greiðendur skatta á síðasta ári. Þetta kemur fram í fréttatilkynningu sem barst rétt í þessu.
Í tilkynningu segir að í framhaldi af áliti Persónuverndar um vefinn tekjur.is þar sem hægt var að skoða tekjur Íslendinga, hafi framkvæmd ríkisskattstjóra við framlagningu og birtingu upplýsinga úr álagningarskrá verið tekin til endurskoðunar. Þeirri könnun er ekki lokið.
„Ljóst er þó að ríkisskattstjóri mun ekki senda fjölmiðlum upplýsingar um hæstu greiðendur, þar sem slík birting er ekki talin samræmast þeim ákvæðum sem gilda um persónuvernd og friðhelgi einkalífs.“
Álagningarskrá mun ekki vera lögð fram fyrr en daganna 19. ágúst til 2. september, þrátt fyrir að álagningar- og innheimtuseðlar einstaklinga verði eftir sem áður aðgengilegir á vef ríkisskattstjóra þann 31. maí.
Samkvæmt þessari tilkynningu mega landsmenn bíða fram á haust eftir Tekjublöðunum svonefndu sem njóta mikilla vinsælda, en upplýsingar í slíkum aukablöðum eru fengnar úr álagningarskrá.