Svona hefst Facebook-færsla sem Helga Vala Helgadóttir, þingmaður Samfylkingarinnar, skrifar um símtal Jóhannesar og fyrrverandi eiginkonu hans sem lekið var í dag. „Hvar halda þeir sem leka slíku samtali að þeir nái að vinna sér inn einhverja samúð?“ spyr Helga. Myndbandið hefur vakið mikla athygli eftir að það var birt en margir hafa gagnrýnt birtingu þess á netinu. Helga Vala er á meðal þeirra sem gagnrýna birtinguna.
„Ég hef ekki hlustað á þetta tiltekna símtal en leyfi mér að halda því fram hér blákalt að öll hjón hafa á einhverjum tímapunkti í sínu lífi sagt eitthvað sem ekki er til eftirbreytni. En að birta svona símtal milli hjóna, í óþökk beggja aðila, vegna einhvers PR stríðs er að mínu mati fullkomlega óforskammað.“
Helga Vala tekur þó fram að henni finnist það gott að fjölmiðlar séu að upplýsa almenning um það sem er í gangi á bakvið tjölldin í garð Jóhannesar uppljóstrara. Þá talar hún um það þegar hún var dregin í viðtal ásamt öðrum þingmanni til að tala um Samherjaskjölin og afhjúpar þá hvað dagskrárgerðarmaður viðtalsins hafði að segja um málið. „Eftir viðtalið var dagskrárgerðarmaðurinn mjög æstur yfir því að fjölmiðlarnir væru ekki að greina frá hvað uppljóstrarinn væri nú vondur maður og dró allskonar mál fram, sem honum höfðu verið sögð af ákveðnum aðilum. Það er nefnilega líka ágætt að við áttum okkur á þegar fólk svífst einskis, þá vitum við hversu lágt er hægt að leggjast og tökum ekki þátt í að dreifa.“