Eyþór Arnalds, oddviti Sjálfstæðismanna í Reykjavík, fullyrti fyrr í dag á Sprengisandi á Bylgjunni að hann hafi greitt Samherja fyrir hlut sem hann keypti af félaginu í Morgunblaðinu. Líkt og Stundin greindi frá á dögunum þá var stór hluti lánsins vegna kaupa á bréfunum afskrifaður.
Samkvæmt Stundinni þá hefur Samherji afskrifað ríflega helming af kröfum sínum á hendur eignarhaldsfélagi Eyþórs vegna hlutabréfaviðskipta í Morgunblaðinu árið 2017. Sami fjölmiðill færir rök fyrir því að um sýndarviðskipti væri að ræða þar sem félag Eyþórs hafi tekið við hlutabréfum Samherja án þess að hafa greitt eða muni greiða fyrir þau. Félag Eyþórs er sagt hafa fengið 225 milljóna kúlúlán fyrir hlutabréfunum.
Í Sprengisandi sagði Eyþór að þetta hafi verið greitt. „Það er greitt fyrir hann. Hann er bara í félagi. Þau viðskipti eru búin. Þetta er þannig að félagið sem ég er með hefur líka fært niður hlutinn. Það er alveg klárt að þessi taprekstur sem hefur verið í gangi, hann hefur verið mikill og þess vegna er mjög umdeilanlegt hvers virði þessi hlutur er. Þú þekkir það með fjölmiðla, þeir náttúrulega berjast í bökkum og maður vissi að þetta er áhætta, það er bara þannig,“ sagði Eyþór í viðtalinu.