Bandarísk yfirvöld hafa látið íslensk stjórnvöld fá sem nemur 355 milljónum króna vegna aðstoðar við rannsókn Silk Road-málsins svokallaða. Silk Road var sölusíða á myrkranetinu svokallaða, „Dark Web“, en þar var meðal annars hægt að kaupa fíkniefni með rafmyntinni Bitcoin.

Fréttablaðið greinir frá þessu í dag.

Bandarísk yfirvöld hófu rannsókn á málinu árið 2013 og komu fulltrúar bandarísku alríkislögreglunnar, FBI, meðal annars hingað til lands þar sem Silk Road var hýst hér á landi.

Í Fréttablaðinu kemur fram að andvirði ólöglegs ávinningur af lögbrotum sé oftar en ekki látinn renna til lögregluyfirvalda í Bandaríkjunum. Bandarísk yfirvöld ákváðu að 15 prósent þess fjár sem fékkst fyrir þá rafmynt sem gerð var upptæk í málinu myndi renna til íslensku lögreglunnar.

Lögum samkvæmt þurfti upphæðin að renna beint í ríkissjóð – en ekki beint til lögreglunnar hér á landi. Áslaug Arna Sigurbjörnsdóttir, dómsmálaráðherra, segir að eftir að ljóst varð að upphæðin yrði lögð inn í ríkissjóð hafi verið ákveðið að hún rynni í sérstakan löggæslusjóð. Verður upphæðinni varið til rannsókna á skipulagðri glæpastarfsemi hér á landi.