Leit að Björn Debecker, 41 árs belgískum ferðamanni sem talinn er hafa fallið í Þingvallavatn um liðna helgi, mun halda áfram í dag. Kafarar frá sérsveit ríkislögreglustjóra, Landhelgisgæslunni, Slökkviliði höfuðborgarsvæðisins og Landsbjörg munu vera við leit í vatninu í dag.

Þetta segir lögreglan á Suðurlandi í færslu á Facebook-síðu sinni. Þar kemur enn fremur fram að eingöngu verði leitað með köfurum.

„Rannsókn málsins hefur leitt til þess að leitarsvæðið hefur verið þrengt og er nú horft sérstaklega til suðurhluta vatnsins.“

Í frétt RÚV í morgun kom fram að lögregla hafi stuðst við farsímagögn til að rekja ferðir Björns áður en hann hvarf. Þá er hann sagður hafa sent móður sinni mynd skömmu áður en hann hélt út á vatnið, en myndin gefur vísbendingar um hvaðan hann lagði af stað. Þessar upplýsingar urðu til þess að hægt var að þrengja leitarsvæðið.